Մեր տարածաշրջանում Ադրբեջանն ինչ ուզել՝ արել է, իսկ ՌԴ-ն կա՛մ չի կարողացել, կա՛մ չի արձագանքել. Ալեն Սիմոնյան

ԱԺ նախագահ Ալեն Սիմոնյանը կարծում է, որ Ռուսաստանի կողմից Հայաստանին զենք չմատակարարելու հարցը կարող է ׇգործընկերային ձևով լուծել:

«Ռուսական կողմը շանս ունի ցույց տալու, որ, այնուամենայնիվ, ինքը շարունակում է հավատարիմ մնալ իր հայտարարած սկզբունքներին ու ստորագրած փաստաթղթերին, բայց սա ոչ մի ձև չի ազդելու Հայաստանի որոշման վրա` ապահովել Հայաստանի անվտանգությունը»,-  ասել է Ալեն Սիմոնյանը:

Սիմոնյանի խոսքով՝ փաստ է, որ Ռուսաստանը չի կատարում իր պարտավորությունները, իսկ Հայաստանը պետք է պաշտպանի իր շահերը:

Հարցին` ՀԱՊԿ նիստին չմասնակցելու որոշումը ինչո՞վ է Սիմոնյանը հիմնավորել` նա պատասխանել է, որ այդ նիստին մասնակցելու իմաստ չի տեսնում:

«Կան չլուծված հարցեր, մարդիկ չեն կատարում իրենց պարտավորությունները»,- ասել է ԱԺ նախագահը։

Սիմոյանի խոսքով` Ադրբեջանն ինչ ուզել` մեր տարածաշրջանում արել է, ու Ռուսաստանը կա՛մ չի կարողացել, կա՛մ չի արձագանքել:

«Հիշո՞ւմ եք՝ ինչ աղմուկ բարձրացրեց Ռուսաստանը, երբ Հայաստանը հումանիտար օգնություն ուղարկեց Ուկրաինա, երբ մի քանի տարի էր` պատերազմ էր: Ադրբեջանը բազմաթիվ անգամ նման օգնություն է ուղարկել, բայց ոչ մի ծպտուն Ռուսաստանի «արդարացի» ԱԳՆ-ից», - նշել է Սիմոնյանը:

Ըստ Ալեն Սիմոնյանի՝ ՌԴ-ն շատ ցավոտ է արձագանքում Հայաստանի պարագայում, իսկ Ադրբեջանի պարագայում ձև է անում, թե չի նկատել: