ՏԵՍԱՆՅՈՒԹ․ Կմեղմացվի առանց ԱՊՊԱ–ի մեքենա վարելու պատիժը․ նոր նախագիծ

ԱՊՊԱ պայմանագիր չունեցող քաղաքացիների համար ՀՀ խորհրդարանը խրախուսող նորմ է առաջարկում։ ՔՊ–ական պատգամավոր Էդուարդ Աղաջանյանն ԱԺ պաշտպանության և անվտանգության հարցերի հանձնաժողովի նիստում ներկայացրել է «Վարչական իրավախախտումների վերաբերյալ ՀՀ օրենսգրքում փոփոխություն կատարելու մասին» նախագիծը։

Այժմ ՀՀ քաղաքացիներն ԱՊՊԱ պայմանագիր չունենալու պարագայում տուգանվում են 100 000 դրամով։

«Ըստ խրախուսվող նորմի` ԱՊՊԱ պայմանագիր չունենալու հանգամանքը արձանագրելուց հետո 24 ժամվա ընթացքում պայմանագիր կնքելու և դրա մասին հավաստի ապացույց ոստիկանություն ներկայացնելու դեպքում քաղաքացին կկարողանա վճարել 25 000 դրամ տուգանք` 100 000–ի փոխարեն»,– ասել է պատգամավորը։

Հարցը քննարկվել է ներքին գործերի նախարարության գործընկերների հետ, դեռևս որոշ տեխնիկական հարցեր պետք է քննարկվեն։ Ներկա պահին հստակեցումներ պետք է մտցվեն, որ գուցե ՆԳՆ–ում տվյալների բազա ստեղծվի, որպեսզի, այնուամենայնիվ, վարորդները ստիպված չլինեն գնալ ոստիկանություն և ներկայացնել համապատասխան փաստաթուղթը։

Հավելենք, որ նախագիծը դրական եզրակացություն ստացավ հանձնաժողովում և կքննարկվի խորհրդարանի լիագումար նիստում: