Իսրայելը հարվածել է փախստականների ճամբարին. ՀԱՄԱՍ
ՀԱՄԱՍ-ը հայտարարել է փախստականների ճամբարին Իսրայելի հարվածի մասին։ Փլատակներից դուրս են բերվել 47 զոհվածների մարմիններ, գրում է AFP-ն։
BBC News-ի հաղորդմամբ` Գազայի հատվածի առողջապահության նախարարությունը, ինչպես նաև մոտակա հիվանդանոցի տնօրենը պնդում են, որ անկլավի հյուսիսում գտնվող Ջաբալիա փախստականների ճամբարում պայթյունի հետևանքով առնվազն 50 մարդ է զոհվել։
Պայթյունի պատճառը, ինչպես ասում են նախարարությունում, իսրայելական ավիահարվածն է եղել։ ՀԱՄԱՍ-ի կողմից վերահսկվող գործակալության տվյալներով՝ մոտ 150 մարդ վիրավորվել է, իսկ «տասնյակները» մնում են փլատակներում։
Իսրայելի պաշտպանության բանակը դեռևս չի մեկնաբանել միջադեպը։
Ջաբալիա ճամբարը գտնվում է Գազա քաղաքի հյուսիսային մասում: BBC News-ի փոխանցմամբ՝ սա Գազայի ութ փախստականների ճամբարներից ամենամեծն է։ ՄԱԿ-ի տվյալներով՝ 2023 թվականի հուլիսի դրությամբ այնտեղ գրանցվել է ավելի քան 116 հազար պաղեստինցի փախստական։
