Վարչապետի մամուլի խոսնակը՝ 100-հազարական դրամների փոխանցման մասին
Միանվագ 100-հազարական դրամներն արդեն փոխանցվել են շուրջ 95 տոկոսին: Նախօրեին 15 207 անձի ևս փոխանցվել են 100-հազարական դրամները, որոնցից 9447-ը անչափահասներ են, չափահասները 5760-ն են: Այդ մասին ասաց վարչապետի մամուլի քարտուղար Նազելի Բաղդասարյանը՝ ներկայացնելով Կառավարության հումանիտար կենտրոնի կողմից բռնի տեղահանվածների համար իրականացվող աջակցության ծրագրերի ընթացքը:
«Այս պահի դրությամբ ընդհանուր թվով 95 200 անձ, այսինքն՝ 95 տոկոսը մենք գրեթե հատել ենք»,- ասաց նա՝ նշելով, որ որոշ մասի գումարները փոխանցվելու են նաև «Հայփոստի» միջոցով:
Նազելի Բաղդասարյանը հայտնեց, որ հաջորդ շաբաթվա ընթացքում կփոխանցվեն նաև վարձակալության գումարները: «Հիշեցնեմ, որ 40-հազարական դրամ՝ յուրաքանչյուր անձին՝ վարձակալության համար և 10-հազարական դրամ՝ կոմունալ ծախսերի համար. և՛ չափահասներին, և՛ անչափահասներին»,- ասաց վարչապետի մամուլի քարտուղարը՝ նշելով, որ վարձակալության գումարները տրամադրվելու են առաջիկա 6 ամիսների համար:
Վարչապետի խոսնակը նաև հայտնեց, որ Լեռնային Ղարաբաղից բռնի տեղահանված և Հայաստան տեղափոխված ընտանիքներում 88 երեխա է ծնվել։ «Երեխաներից 45–ը ծնվել են Երևանում, 43–ը՝ ՀՀ մարզերում»,–ասաց նա։
Հումանիտար կենտրոնում կայացած ճեպազրույցի ժամանակ նա նշեց, որ Լեռնային Ղարաբաղից բռնի տեղահանված և Հայաստանում դպրոց հաճախող երեխաների թիվը մեկ օրում ավելացել է 124–ով և դարձել 15 388։
