Ռումբի ահազանգ. Ֆրանսիայի օդանավակայաններում տարհանումներ են սկսվել

Ֆրանսիայի մի քանի օդանավակայաններում ռումբի մասին հաղորդումների պատճառով ուղևորները տարհանվել են: Այս մասին հայտնում է Интерфакс–ը:

BFMTV հեռուստաալիքի տվյալներով՝ Ֆրանսիայի անվտանգության ծառայությունները տարհանում են մարդկանց երկրի մի շարք տարածաշրջանային օդանավակայաններից՝ ռումբի սպառնալիքի մասին հաղորդագրությունների պատճառով, որոշ չվերթներ հետաձգվել են: Խոսքը, մասնավորապես, Մոնպելյեի, Նանտ-Ատլանտիկայի և Բորդոյի օդային նավահանգիստների մասին է։ 

Նախօրեին Ֆրանսիայի ավելի քան 10 օդանավակայաններ տարհանվել էին նմանատիպ հաղորդումների պատճառով։ Այս շաբաթվա սկզբին Վերսալի պալատը տարհանվել էր ահաբեկչության սպառնալիքի պատճառով։ Պարզվել է, որ բոլոր հաղորդումները կեղծ են։ 

Չորեքշաբթի տրանսպորտի նախարար Կլեման Բոնն ասել է, որ «կեղծ հաղորդագրությունները չար կատակ են, և պատասխանատուները կպատժվեն»։