ՏԵՍԱՆՅՈՒԹ․ Բաքվում սկսվել է Վագիֆ Խաչատրյանի դատավարությունը. փաստաբանը հրաժարվել է պաշտպանել․ ԶԼՄ

Բաքվում սկսվել է Վագիֆ Խաչատրյանի դատավարությունը։ Այս մասին հայտնում են ադրբեջանական ԶԼՄ-ները։ 

Նրանց փոխանցմամբ, փաստաբան Նաթիգ Բեյբալաևն առողջական խնդիրների պատճառով հրաժարվել է պաշտպանել Վագիֆ Խաչատրյանին։ Այժմ նրա իրավունքները պաշտպանելու է Ռադմիլա Աբիլովան։

Հրապարակված կադրերում երևում է նաև, որ Վագիֆ Խաչատրյանին մոտենում է մի տղամարդ և ինչպես գրում են ադրբաեջանական կայքերը, հարցնում է. «ճանաչեցի՞ր ինձ»:

Հիշեցնենք՝ հոկտեմբերի 13-ին՝ առաջին դատական նիստի ժամանակ, դատարանը անխափան է թողնել Վագիֆ Խաչատրյանի նկատմամբ ընտրված խափանման միջոցը(3 ամիս կալանավորում)։ 

Հուլիսի 29-ին Ադրբեջանի սահմանապահ ծառայության ներկայացուցիչները Բերձորի միջանցքում ապօրինի տեղակայված ադրբեջանական «անցակետից» առևանգել էին վիրահատության նպատակով Կարմիր Խաչի միջազգային կոմիտեի միջոցով Արցախից Հայաստան տեղափոխվող 68-ամյա Վագիֆ Խաչատրյանին։ Ադրբեջանից հայտնել էին, որ Խաչատրյանը «գտնվում էր միջազգային հետախուզման մեջ»։ Բաքվում նրան մեղադրում են «ցեղասպանության, ադրբեջանցիների տեղահանության մեջ», իբր հանցագործությունը կատարվել է 1991 թվականի դեկտեմբերին Խոջալուի շրջանի Մեշալի գյուղում։