Գևորգ Ալթունյանը կալանավորվել է․ «Հրապարակ»

«Հրապարակ» թերթը գրում է. 
 

«ՊՆ լրատվական վարչության նախկին ղեկավար Գևորգ Ալթունյանը կալանավորվել է։ Նրա պաշտպան Գոռ Սողոյանը ասել է․

 «Առաջին ատյանի դատարանը տնային կալանք և գրավ կիրառեց, դատախազությունը բողոքարկեց, վերաքննիչը բեկանեց։ Քննչականն ի սկզբանե դիմել էր կալանավորման միջնորդությամբ, սակայն դատարանը տնային կալանք և գրավ էր կիրառել»։
 

 Բողոքարկելո՞ւ են վերաքննիչի որոշումը։
 

«Պետք է քննարկենք, այս պահի դրությամբ` ոչ, բողոքարկված չէ»։ 
 

Ալթունյանի մասնակցությամբ ի՞նչ քննչական-դատավարական գործողություններ են իրականացվել։
 

«Մենք ենք միջնորդել, հարցաքննվել է, շատ ծավալուն ցուցմունք է տվել, և էլի գործողություններ ենք միջնորդել, որ կատարեն, որովհետև այն, ինչ իրեն առաջադրված է, որևէ կապ չունի իրականության հետ»,- ասել է Սողոյանը։
 

Նշենք, որ Ալթունյանն ու ևս 4 անձ, այդ թվում՝ Dasaran.am կայքի հիմնադիր Սուրեն Ալոյանը, մեղադրվում են «ՊՆ գնումների գործընթացի արդյունքում փաստաթղթերում կեղծ տեղեկություններ զետեղելու եղանակով պետությունից 106 մլն 300 հազար դրամ հափշտակելու մեջ»։  Նրանք իրենց առաջադրված մեղադրանքները չեն ընդունում»: