Էրդողանը կոչ է արել դադարեցնել «աննախադեպ դաժանությունները» Գազայում և մեղադրել Իսրայելին հիվանդանոցի վրա ավիահարվածի համար
Թուրքիայի նախագահ Ռեջեփ Թայիփ Էրդողանը մեղադրել է Իսրայելին Գազայի հիվանդանոցի վրա հարձակման մեջ։
Գազայի հիվանդանոցի վրա հարձակումից հետո Էրդողանը կոչ է արել միջազգային հանրությանը դադարեցնել «աննախադեպ դաժանությունը» պաղեստինյան անկլավում։
«Ես կոչ եմ անում ողջ մարդկությանը քայլեր ձեռնարկել Գազայում այս աննախադեպ դաժանությունը դադարեցնելու համար, որը պատմության մեջ օրինակներ չունի», - ասվում է X սոցիալական ցանցում Էրդողանի հայտարարության մեջ:
Պաղեստինի առողջապահության նախարարությունը ավիահարվածի համար մեղադրել է իսրայելական բանակին։ Միևնույն ժամանակ, ինչպես հայտնում է AP–ն, Իսրայելի պաշտպանության բանակի խոսնակ Դանիել Հագարին ասել է, որ Իսրայելը ստուգում է հիվանդանոցին հարվածելու մասին հաղորդումները: Հագարին հավելել է, որ չգիտի՝ արդյոք հիվանդանոցում պայթյունը տեղի է ունեցել իսրայելական բանակի հարվածից, թե ոչ:
