Կրեմլը տեղյակ չէ Հայաստանում ռուսական բազայի մասին Փաշինյանի խոսքերից. Պեսկով

Կրեմլը տեղյակ չէ Հայաստանում ռուսական բազայի առկայության առավելությունների բացակայության մասին Փաշինյանի խոսքերից: Այս մասին ասել է ՌԴ նախագահի մամուլի քարտուղար Դմիտրի Պեսկովը։ 

«Մենք դեռ չգիտենք՝ արդյոք նա ասել է այս խոսքերը, և եթե նա ասել է դրանք, ապա որտեղ, ինչ համատեքստում: Մենք նման տվյալներ չունենք»,- ասել է նա Интерфакс-ին՝ մեկնաբանելով The Wall Street Journal-ի հրապարակումը: 

Ավելի վաղ լրատվամիջոցի հետ հարցազրույցում Փաշինյանը ասել է, որ առավելություններ չի տեսնում Հայաստանում ռուսական ռազմակայանի շարունակական ներկայության մեջ։ 

«Մենք չենք կարող Wall Street Journal-ը որպես առաջնային աղբյուր ընդունել»,- հավելել է Կրեմլի ներկայացուցիչը։ 

102-րդ ռուսական ռազմակայանը Գյումրիում տեղակայված է 1995 թվականից։ 2011 թվականին Հայաստանում ռուսական ռազմակայանի գտնվելու ժամկետը երկարացվել է մինչև 2044 թվականը։