Հեռու են բավարար լինելուց․ Բորելը՝ Չինաստանի և ԵՄ–ի տնտեսական հարաբերությունների մասին

Եվրամիության և Չինաստանի տնտեսական հարաբերությունները հեռու են բավարար լինելուց։ Այս մասին հայտարարել է ԵՄ արտաքին քաղաքականության և անվտանգության հարցերով գերագույն ներկայացուցիչ Ժոզեպ Բորելը։

«Տնտեսական ճակատում մեր հարաբերություններն այժմ հեռու են բավարար լինելուց։ Չինաստանի համար մենք խոշոր արտահանման շուկա ենք, սակայն այդ հարաբերությունները երկար տարիներ անհավասարակշիռ են եղել, և այդ անհավասարակշռությունը շարունակում է խորանալ», – South China Morning Post թերթի համար իր հեղինակային հոդվածում նշել է Բորելը։

Նրա կարծիքով` այդ անհավասարակշռության աճը զգալիորեն կապված է մշտական դժվարությունների հետ, որոնց բախվում են եվրոպական ընկերությունները չինական շուկա դուրս գալիս։

«Մենք բազմիցս Չինաստանի իշխանությունների հետ բարձրացրել ենք այդ դժվարությունների հարցերը։ Վերջերս Չինաստան եվրոպական ներդրումների կտրուկ անկում է նկատվել։ Չինական շուկային առավել հարմար հասանելիություն չունենալու պարագայում եվրոպական ներդրողները երես են թեքում», – ընդգծել է նա։

Հոկտեմբերի 12-14-ը Բորելն այցով գտնվում է Պեկինում։ Նա հանդիպումներ կունենա ՉԺՀ-ի մի շարք քաղաքական գործիչների հետ, ելույթ կունենա Պեկինի համալսարանում, ինչպես նաև կմասնակցի ԵՄ–Չինաստան ռազմավարական երկխոսության 12-րդ նիստին։