Որքան է մարդկային կորուստների թիվը Իսրայելում և Գազայի հատվածում

Պաղեստինի ՀԱՄԱՍ խմբավորման՝ շաբաթ օրը սկսած անակնկալ հարձակման հետևանքով Իսրայելի մարդկային կորուստները գերազանցել են 1,200-ը: Ինչպես գրում են լրատվամիջոցները, այս մասին հայտարարել է Իսրայելի պաշտպանական ուժերի խոսնակ Ջոնաթան Կոնրիկուսը:

Վերջինս մանրամասնել է, որ զոհերի մեծամասնությունը խաղաղ բնակիչներ են:

Մինչդեռ Գազայի հատվածում Իսրայելի ռազմական գործողությունների հետևանքով զոհերի թիվը գերազանցել է 950-ը, ավելի քան 5 հազար մարդ վիրավորվել է։ Այս մասին հայտնել է Գազայի հատվածի առողջապահության նախարարությունը։ Հայտնի է, որ զոհերի մեջ կան երկու հարյուից ավելի երեխաներ:

Հավելենք, որ զոհերի թվում է նաև հայտնի խորհրդային տեսաբան ֆիզիկոս Սերգեյ Գրեդեսկուլն ու իր կինը։ Նրանք սպանվել են հոկտեմբերի 7-ին բնակավայրի վրա ՀԱՄԱՍ–ի զինյալների հարձակման ժամանակ՝ իսրայելական Օֆակիմ քաղաքում։

Հիշեցնենք` հոկտեմբերի 7-ի առավոտյան Իսրայելը Գազայի հատվածից աննախադեպ հրթիռային հարձակման ենթարկվեց։ Իսրայելի բանակի մամուլի ծառայությունից հայտնեցին, որ ծայրահեղականներն ավելի քան 3 հազար հրթիռ են արձակել: Բացի այդ, տասնյակ զինյալներ ներխուժել են Իսրայելի հարավում գտնվող սահմանամերձ շրջաններ։ Իսրայելը պատասխան հարվածներ է հասցրել։