ՏԵՍՆԱՅՈՒԹ․ Ձեզ համար պատի՞վ է «Հանրային ձայն»-ի պասիվ աջակցությամբ քաղաքապետ ընտրվելը. հարց՝ Ավինյանին
Ձեզ համար պատի՞վ է Դոգի «Հանրային ձայն» կուսակցության պասիվ աջակցությամբ քաղաքապետ ընտրվելը, որովհետեւ եթե նրանք չմասնակցեին ավագանու նիստին, այս ընտրությունը տեղի չէր ունենա: Այս հարցը այսօր՝ հոկտեմբերի 10-ին, մամուլի ասուլիսի ժամանակ լրագրողներից մեկն ուղղեց Երեւանի քաղաքապետ ընտրված Տիգրան Ավինյանին:
Ի պատասխան Ավինյանն ասաց. «Արձանագրումը, որ ընտրությունները եղել են ազատ, արդար եւ թափանցիկ, շատ կարեւոր է, եթե շարունակենք հակառակ թեզերը առաջ տանել, մեր հասարակությունը, մեր երկիրը դրանից չի շահելու:
Ինձ համար մեծագույն պատիվ է առաջին հերթին, որ Երեւան քաղաքում 32 տոկոսից ավելի երեւանցիներ իրենց քվեն տվել են մեր ուժին, հավատացել են մեր ծրագրերին: Ինձ համար մեծագույն պատիվ է լինելու ծառայել նրանց որպես Երեւանի քաղքապետ, եւ ինձ համար մեծագույն պատիվ է լինելու իրականացնել այն ծրագրերը, որոնք մենք խոստացել ենք իրականացնել: Մենք այդ ծրագրերը իրականացնելու ենք:
Ինչ վերաբերում է մյուս քաղաքական ուժերին, երեւանցիները իրենց ձայնը տվել են 5 քաղաքական ուժերի եւ նրանք ամեն մեկն իր ձեւով իր դիրքորոշումները հայտնել է: Մի ուժ որոշել է, որ ուզում է բոյկոտել այս նիստը, մեկ այլ ուժ որոշել է, որ չի ուզում բոյկոտել այս նիստը: Մենք եւ «Հանրապետությունը» որոշում ենք կայացրել, որ միասին հուշագիր ենք ստորագրելու եւ միասին ենք կիսելու պատասխանատվությունը: Մնացած հարցերը պետք է տաք մնացած ուժերին»;
Տիգրան Ավինյանն ասաց, որ իրենք պաշտոններ չեն կիսել՝ ի տարբերություն ոմանց․ «Ետընտրական շրջանում բոլորը տեսել են ամեն ինչ։ Պետք չէ անուններով ամեն ինչ կոչել։ Ամեն ինչ եղել է հանրային, բոլորը բացահայտ իրար հետ այդ առևտուրն իրականացրել են։ Մենք ասել ենք՝ մերժում ենք այդ ձևը։ Մենք հրաժարվում ենք այլ ուղղվածություններ ու այլ գաղափարական հենք ունեցող խմբակցությունների հետ որևէ դաշինք կազմել։ Եթե քո ծրագրերը նույն բանի մասին չեն, եթե դու, օրինակ, չես մտածում Երևան քաղաքի, երևանցիների մասին, եթե դու նույնիսկ այս երկրի մասին չես մտածում, եթե դու այլ երկրի շահերին պոտենցիալ ծառայող ես, մենք չենք կարող նման ուժերի հետ դաշինք կազմել։ Եվ մեզ մոտ քաղաքական առևտուր տեղի չի ունեցել։ Սա համագործակցության շուրջ դաշինք է»։
