ՏԵՍԱՆՅՈՒԹ․ Տիգրան Ավինյանը երդվեց` ստանձնելով քաղաքապետի լիազորությունները
Երևանի քաղաքապետարանում ընթանում է նորընտիր քաղաքապետ Տիգրան Ավինյանի երդմնակալության արարողությունը։ Արարողությանը ներկա են երկրի բարձրաստիճան պաշտոնյաներ, այդ թվում՝ ՀՀ նախագահ Վահագն Խաչատուրյանը, որը, ի դեպ, Հայաստանի անկախությունից հետո Երևանի առաջին քաղաքապետն էր։
Ավինյանը ստանձնելով Երևանի քաղաքապետի պաշտոնը՝ երդվեց հետևել Սահմանադրությանն ու օրենքներին, կատարել քաղաքի ավագանու որոշումները, բարեխղճորեն կատարել իր պարտականությունները, ամեն օր աշխատել հանուն Երևանի և երևանցիների բարեկեցության, պաշտպանել քաղաքացիների օրինական շահերը։
«Պարտավորվում եմ հոգ տանել մեր հնագույն մայրաքաղաքի պահպանման համար, պաշտպանել համայնքի իրավունքները, օրինական շահերն ու սեփականությունը ուժերիս անմնացորդ նվիրումով , նպաստել ժողովրդի նյութական և մտավոր վերելքին, աջակից լինել ամեն մի ազնիվ նախաձեռնության, որը միտված կլինի իմ քաղաքացիների նվիրական գաղափարների իրականացմանը»,–ասաց Ավինյանը։
Նշենք, որ Տիգրան Ավինյանը նորանկախ Հայաստանի Երևանի 13-րդ քաղաքապետն է։ Հիշեցնենք՝ հոկտեմբերի 10-ին Երևանի ավագանին Երևան քաղաքի 14-րդ քաղաքապետ ընտրեց Տիգրան Ավինյանին։
