Խաղաղության պայմանագրի ստորագրումից կորցրած ամեն օր ՀՀ-ին մոտեցնում է ավելի մեծ կորուստների․ Ուսուբով
Խաղաղության պայմանագրի ստորագրումից կորցրած յուրաքանչյուր օր Հայաստանին մոտեցնում է ավելի մեծ կորուստների։ Այս մասին հայտարարել է Ադրբեջանի անվտանգության խորհրդի քարտուղար Ռամիլ Ուսուբովը։
«Սահմանազատման և սահմանագծման գործընթացի ավարտը, խաղաղության պայմանագրի ստորագրումն ավելի շատ անհրաժեշտ է Հայաստանին։ Ադրբեջանը լիովին ապահովել է իր տարածքային ամբողջականությունը, մեր սահմանները վերցվել են լիակատար վերահսկողության տակ, հակառակ կողմից մեր երկրի համար վտանգ ներկայացնող ռազմավարական դիրքերը գտնվում են մեր հսկողության տակ»,- ասվում է Ուսուբովի հոդվածում։
Նա նաև ասել է, որ այսպես կոչված «Զանգեզուրի միջանցքի» բացումն իր հերթին լրացուցիչ խթան կհանդիսանա ողջ տարածաշրջանի զարգացման համար և մեծ տնտեսական օգուտ կբերի Հայաստանին:
Նրա խոսքով, երկրի պատմության մեջ նոր էջ բացելու հայ հասարակության կոչերը հույս են տալիս, որ Հայաստանը, այնուամենայնիվ, կձգտի Ադրբեջանի հետ խաղաղության պայմանագրի շուտափույթ ստորագրմանը։
