Եթե խաղաղապահները ԼՂ–ից դուրս գան, ուրեմն պետք է հետ գնան Ռուսաստան. Փաշինյան

Եթե ՌԴ խաղաղապահները Լեռնային Ղարաբաղից դուրս գան, ուրեմն նրանք պետք է հետ գնան Ռուսաստան։ Հանրային հեռուստաընկերության եթերում այս հայտարարությունն է արել ՀՀ վարչապետ Նիկոլ Փաշինյանը։  

«Նրանք ՌԴ խաղաղապահ զորախումբն են ԼՂ–ում, եթե այնտեղից դուրս են գալիս, պետք է վերադառնան Ռուսաստան»,– ասել է նա` պատասխանելով հարցին, թե հնարավոր է արդյոք, որ խաղաղապահները գան Հայաստան և մնան այստեղ։ Ի դեպ, ամբողջական հարցազրույցը կարող եք դիտել այսօր՝ 22:10-ին:   

Նշենք, որ ՌԴ ԱԳՆ պաշտոնական ներկայացուցիչ Մարիա Զախարովան ավելի վաղ հայտնել էր, որ ՌԴ խաղաղապահների գործունեությունը կադապտացվի նոր իրողությանը։ Ըստ պաշտոնական հաղորդագրությունների` ՌԴ խաղաղապահներն իրենց դիտակետերից 6-ն արդեն փակել են։ 

ՀՀ վարչապետ Նիկոլ Փաշինյանը հայտարարել է նաև, որ Հայաստանը պատրաստ է Ադրբեջանի հետ բանակցել «3+3» ձևաչափով։ 

Ադրբեջանի նախագահ Իլհամ Ալիևը հոկտեմբերի 6-ին հայտարարել էր, որ մոտ ապագայում «3+3» (Ադրբեջան, Վրաստան, Հայաստան, Թուրքիա, Ռուսաստան և Իրան) ձևաչափով հանդիպումներ են լինելու։ Նա նշել էր, որ «3+3» ձևաչափի հանդիպման նախաձեռնողը Ադրբեջանն է: 

«Հայաստանը պատրաստ է հանդիպում անցկացնել «3+3» ձևաչափով։ Ժամանակին ձեռք է բերվել պայմանավորվածություն, որ «3+3» ձևաչափով հաջորդ հանդիպումը տեղի կունենա Թեհրանում»,– ասել է Փաշինյանը։