Ադրբեջանի հաջորդ թիրախը Հայաստանում գտնվող «անկլավներն» են. Ալեքսանդր Լապշին

Բլոգեր, Ռուսաստանի և Իսրայելի քաղաքացի Ալեքսանդր Լապշինը խոսել է Հայաստանին հարվածելու Ադրբեջանի համար ստեղծված հազվագյուտ հնարավորությունից:  

«Իսրայելի և ՀԱՄԱՍ-ի պատերազմի լույսի ներքո աշխարհում մնացած բոլոր պատերազմներն ու հակամարտությունները խիստ հետին պլան մղվեցին, համաշխարհային ԶԼՄ-ները գրեթե մոռացան Ուկրաինայի մասին և բացարձակապես մոռացան Հայաստանի և Ադրբեջանի մասին։

Ինչից անմիջապես օգտվեցին Ուկրաինայում ռուսական զորքերը և անցան 2023 թվականի ամենալայնածավալ հարձակմանը՝ հարվածելով Ուկրաինային Դոնբասի Ավդեևկա շրջանին և մասամբ ճեղքելով պաշտպանությունը։ 

Բայց ոչ միայն Ռուսաստանն է օգտվել Գազայի հատվածի պատերազմից, Ադրբեջանը նույնպես չի պատրաստվում կորցնել Հայաստանին հարվածելու հազվագյուտ հնարավորությունը։ Այս անգամ Ալիևի «անկլավների ազատագրում» նպատակներն են ՝ առաջին հերթին Տիգրանաշենը՝ Երևան - Սիսիան գլխավոր մայրուղու հատավածը, Իջևանը Բերդին կապող մայրուղու հատվածը, և երրորդ անկլավը ՝ Ոսկեպար գյուղի շրջանում, որը գտնվում է հենց Երևանը Թբիլիսիին կապող գլխավոր ճանապարհի վրա։

Ադրբեջանական տարածքի այդ շատ փոքր «կղզյակները» Հայաստանին բռնակցվել են 1992-93 թվականների առաջին պատերազմի ժամանակ ։ Բայց Ադրբեջանն էլ զավթեց ու բռնակցեց մի շարք հայկական տարածքներ, օրինակ Արծվաշեն անկլավը Սևանա լճից մի փոքր հյուսիս։ Այդ հայկական անկլավը տարածքով հավասար է երեք ադրբեջանական անկլավի, բայց, բնականաբար, Ալիևը չի պատրաստվում վերադարձնել այն։ Հայաստանն էլ դրան առանձնապես չի ձգտում, և դա հայկական արտաքին քաղաքականության մեծ սխալն է։ Քանի որ Ադրբեջանը անկլավների հարցն օգտագործում է որպես նոր ագրեսիայի հիմք։

Գիտեք ինչ կլինի, եթե ադրբեջանցիները գրավեն վերը թվարկված 3 անկլավները։ Երևանը կտրվելու է Սյունիքից, այնտեղ մնալու է Սելիմով անցնող ընդամենը մեկ ճանապարհ, որը գրեթե անանցանելի է ձմռանը։ Բացի այդ, շրջափակվելու է Տավուշի Բերդ քաղաքը (ճամբարակով անցնելու է միայն մեկ շատ վատ, մասամբ գրունտային ճանապարհ) և արգելափակվելու է Թբիլիսիի երկու ճանապարհներից մեկը:

Ինչու՞ է դա պետք Ադրբեջանին։ Հայաստանի համար ոչ շահավետ պայմաններով խաղաղության համաձայնագիր պարտադրելու, Հայաստանին ստիպելու հրաժարվել Արցախի նկատմամբ ցանկացած հավակնությունից, ստիպելու հայկական կողմին հայտարարել և ստորագրել, որ Արցախում ոչ մի ցեղասպանություն չի եղել և նաև ստիպելու Հայաստանին ընդունել, որ 2022 թվականի սեպտեմբերին ադրբեջանցիների կողմից օկուպացված հայկական հողերը Ջերմուկի, Սև լճի և Վերին Շորժայի շրջաններում նույնպես Ադրբեջանի տարածք են։ Եվ նաև Ադրբեջանի (Ռուսաստանի հետ համատեղ) նպատակն է Հայաստանում ճնշել ռուսական ազդեցությունից հեռանալու ցանկացած փորձ և հայկական սահմանների պաշտպանությունը պարտադրել այն նույն ռուս խաղաղապահներին, որոնք երկու շաբաթ առաջ դե ֆակտո Արցախը հանձնեցին ադրբեջանական զորքերին»։