Իսրայելի ռազմական գործողությունը պաղեստինյան արմատական ​​ՀԱՄԱՍ շարժման դեմ երկար ժամանակ կպահանջի, երկուշաբթի հայտարարել է Իսրայելի արտգործնախարար Էլի Քոհենը։ 

«Սա ժամանակ կպահանջի, և ոչ թե մի քանի օր, այլ երկար ժամանակ կպահանջի»,- լրագրողների հետ ճեպազրույցում ասել է նա։ 

Նա ընդգծել է, որ Իսրայելը համարում է, որ ՀԱՄԱՍ շարժումը սերտորեն կապված է Իրանի իշխանությունների հետ։ «ՀԱՄԱՍ–ը Իրանի խամաճիկն է»,- ասել է նախարարը։ 

«Մենք գիտենք, որ Իրանը պատմականորեն եղել է ՀԱՄԱՍ-ի շատ ակտիվ աջակիցը և զգալի ֆինանսական և այլ աջակցություն է ցուցաբերել ՀԱՄԱՍ–ին, և մենք կարծում ենք, որ Իրանը դեր է խաղում ՀԱՄԱՍ-ի գործունեության մեջ», - հավելել է Իսրայելի պաշտպանության բանակի խոսնակ, մայոր Լիբի Վայսը: 

Ավելի վաղ Իրանի արտգործնախարարության խոսնակ Նասեր Քանանին հայտարարել էր, որ Իրանը չի մասնակցում պաղեստինյան ՀԱՄԱՍ շարժման՝ Իսրայելի վրա հարձակմանը, և որ Թեհրանի հասցեին մեղադրանքները քաղաքական դրդապատճառներ ունեն։