Ապամոնտաժվել են Ասկերանի, Մարտակերտի և Շուշիի շրջանների նախկին շփման գծի երկայնքով ժամանակավոր դիտակետերը. ՌԴ ՊՆ

Ռուսաստանի Դաշնության պաշտպանության նախարարությունը Լեռնային Ղարաբաղի հակամարտության գոտում ռուսական խաղաղապահ զորախմբի գործունեության մասին տեղեկատվություն է տարածել: 

Նշվում է, որ ռուսական խաղաղապահ զորախումբը շարունակում է առաջադրանքներ իրականացնել Լեռնային Ղարաբաղի տարածքում:

«Բաքվի և Ստեփանակերտի հետ շարունակական փոխգործակցություն է պահպանվում՝ ուղղված արյունահեղության կանխմանը, անվտանգության ապահովմանը և մարդասիրական իրավունքի պահպանմանը խաղաղ բնակիչների նկատմամբ։ 

Ռուսական խաղաղապահ զորախմբի պատասխանատվության գոտում հրադադարի ռեժիմի խախտումներ չեն արձանագրվել։ 

Ավարտվել է Ասկերանի, Մարտակերտի և Շուշիի շրջանների նախկին շփման գծի երկայնքով ժամանակավոր դիտակետերի ապամոնտաժումը»,– գրված է ՌԴ ՊՆ ամենօրյա տեղեկագրում։ 

«Ի կատարումն ռազմական գործողությունների դադարեցման մասին ձեռք բերված պայմանավորվածությունների՝ ռուս խաղաղապահների հսկողության ներքո շարունակվել է Լեռնային Ղարաբաղի զինված կազմավորումների պահեստներում զենքի, ռազմական տեխնիկայի, հրետանային զինամթերքի և ռազմամթերքի հաշվարկը։ Հոկտեմբերի 5-ի դրությամբ առաքվել է 84 միավոր զրահատեխնիկա, 121 միավոր ավտոմոբիլային տեխնիկա, 121 միավոր հակաօդային պաշտպանության տեխնիկա, 105 միավոր դաշտային հրետանի, ՀԿՌՀ և ականանետեր, 1 միավոր ԱԹՍ, ավելի քան 7 հազար միավոր հրետանային և հակատանկային զենքեր, շուրջ 58,5 մլն զինամթերք: 

Զենքի, ռազմական տեխնիկայի և զինամթերքի պահեստային տարածքների պաշտպանությունը կազմակերպվում է ռուս-ադրբեջանական միացյալ պահակակետերի կողմից», հայտնում է ՌԴ ՊՆ–ն։