Արցախից բռնի տեղահանված անձանց 50 %-ն արդեն ստացել է պետության տրամադրած 100 000 դրամ միանվագ օգնությունը

Լեռնային Ղարաբաղից բռնի տեղահանվածների 99.3 տոկոսն արդեն հաշվառվել է։ Հումանիտար կենտրոնում կազմակերպված ճեպազրույցի ժամանակ տեղեկությունը հայտնեց ՀՀ վարչապետի մամուլի խոսնակ Նազելի Բաղդասարյանը։

«Արցախից բռնի տեղահանվածների շուրջ 58000–ի տեղավորման ու կեցության հարցում պետությունն արդեն աջակցել է»,– ասաց նա։

Նա հայտնեց, որ Արցախից բռնի տեղահանված անձանց 50 տոկոսն արդեն ստացել է պետության տրամադրած 100 000 դրամ միանվագ օգնությունը։

Բաղդասարյանը տեղեկացրեց, որ բռնի տեղահանված 76 692 մարդ տեղավորվել է տարբեր մարզերում։ Մասնավորապես` Արագածոտնի մարզում 4109 անձ է տեղավորվել, Արարատում` 18 367, Արմավիրում` 8144, Գեղարքունիքում` 4895, Լոռիում` 4541, Կոտայքում` 22150, Շիրակում՝ 2168, Սյունիքում` 5438, Վայոց Ձորում` 2303, Տավուշում` 3189։