Ռուսները խաբել են Արցախի նախկին նախագահներին․ «Հրապարակ»

«Հրապարակ» թերթը գրում է. 

«Վերջին իրադարձությունների ժամանակ ռուս խաղաղապահներն իրենց խայտառակ վատ են դրսևորել` բացարձակապես չկատարելով իրենց պարտականությունները և խաբելով հայերին: Մենք տեղեկացանք, որ Արցախի նախկին նախագահները մինչև վերջին պահը եղել են խաղաղապահների նստավայրում, և նրանց խոստացված է եղել, որ անվտանգ կտեղափոխեն Հայաստան, բայց ռուսները խաբել են` չկատարելով իրենց խոստումը: Դրա փոխարեն նրանցից ոմանք մեծ գումարներ են աշխատել` ադրբեջանական ցուցակներում գտնվող ինչ-որ անձանց երկրից դուրս բերելու դիմաց:

Մի անձից, օրինակ, ըստ մեզ հասած հավաստի տեղեկությունների, 280 հազար դոլար են վերցրել եւ երկու ավտոմեքենայի համարներ փոխանցել Հակարիում գտնվող ադրբեջանցիներին, որ թույլ տան՝ այդ մեքենաներն անարգել անցնեն սահմանը: Ինքը` Արցախի նախկին նախագահ Արայիկ Հարությունյանը, ով տարիների ջերմ հարաբերություններ ուներ ռուսների հետ, վստահ է եղել, որ ռուսներն իրեն չեն հանձնի Ալիևին»:

Հիշեցնենք՝ ավելի վաղ հայտնել էինք, որ գերեվարվել է նաև Արցախի նախկին նախագահ Արայիկ Հարությունյանը։ Նրան Ադրբեջանում փաստաբան են տրամադրել։ Հրապարակվել են նաև լուսանկարներ։