«Ղարաբաղի հայ բնակչության իրավունքներն ու անվտանգությունը պաշտպանվելու են». Ալիև
Ադրբեջանը «կապահովի» Ղարաբաղի հայ բնակչության իրավունքները։ Այս մասին հայտարարել է Ադրբեջանի նախագահ Իլհամ Ալիևը՝ Արցախի օկուպացված տարածքներ, մասնավորապես՝ Կովսական կատարած այցի ժամանակ:
«Մենք պաշտոնապես հայտարարում ենք, որ Ղարաբաղի հայ բնակչության իրավունքներն ու անվտանգությունը պաշտպանվելու են: Մենք արդեն Ղարաբաղի հայ համայնքին ներկայացրել ենք վերաինտեգրման մեր տեսլականը, որը ներառում է նրանց կրոնական, կրթական, մշակութային, քաղաքային և այլ իրավունքների հարգումը, ինչն արտացոլված է միջազգային կոնվենցիաներում, որոնք Ադրբեջանը ստորագրել է իր Սահմանադրությանը և իր միջազգային պարտավորություններին համապատասխան», -ասել է Ալիևը:
Ադրբեջանի նախագահ Իլհամ Ալիևը հայտարարել է նաև մինչև այս տարվա ավարտ Արցախը շուրջ 5500 ադրբեջանցներով բնակեցնելու մասին։ Ըստ Ադրբեջանական լրատվամիջոցների՝ նա նշել է, որ մինչ այժմ Ադրբեջանի կողմից օկուպացրած տարածքներում բնակեցվել է 2300 ադրբեջանցի, իսկ այս տարվա ավարտին այդ թիվը կհասցվի 5500։
Հիշեցնենք, որ այսօր ժամը 12-ի դրությամբ Արցախից Հայաստան է ժամանել 91.448 բռնի տեղահանված, իսկ այս պահի դրությամբ այդ թիվը հասել է շուրջ 93.000-ի։
