Փաշինյանի հասցեին բռնության կոչերի համար ձերբակալվել է փաստաբան Մուշեղ Շուշանյանը․ ՔԿ
Փաստաբան Մուշեղ Շուշանյանն այսօր ձերբակալվել է` ՀՀ վարչապետ Նիկոլ Փաշինյանի հասցեին քաղաքական հայացքներով պայմանավորված բռնության կոչեր հնչեցնելու համար։ Այս մասին հայտնում է ՀՀ քննչական կոմիտեն։
Կոմիտեից նշում են, որ 2023 թ. մայիսի 9-ին «Ազգային ժողովրդավարական բևեռ» յութուբյան էջում զետեղվել է «Նիկոլի ֆիզիկական ոչնչացումը միանգամայն արդարացված է». Մուշեղ Շուշանյան» վերտառությամբ տեսանյութ, որի ընթացքում էլ հենց Շուշանյանը հանդես է եկել բռնության կոչերով։
Նշվում է նաև, որ նա իր հանցավոր գործունեությունը` բռնություն գործադրելու հրապարակային կոչեր, բռնությունը հրապարակայնորեն արդարացնել և քարոզել, շարունակել է իր ֆեյսբուքյան էջում` մասնավորապես գրելով. «Հայոց զարթոնքը կարող է սկսվել մի պայմանով միայն՝ եթե կիկոլը ու ողջ հայրենավաճառների խմբակը ինքնաբուխ տարերային կերպով մահապատժվեն»:
ՀՀ քննչական կոմիտեում նախաձեռնվել են քրեական վարույթներ, որոնք միացվել են մեկ վարույթում: Շուշանյանի նկատմամբ հարուցվել է հանրային քրեական հետապնդում՝ ՀՀ քրեական օրենսգրքի 330-րդ հոդվածի 2-րդ մասի 3-րդ կետի հատկանիշներով (բռնություն գործադրելու հրապարակային կոչերը, բռնությունը հրապարակայնորեն արդարացնելը կամ քարոզելը, ինչպես նաև այդ նպատակով նյութեր կամ առարկաներ տարածելը):
Վարույթի շրջանակներում որոշում է կայացվել՝ դատարան ներկայացնելու նպատակով վերջինիս ձերբակալելու վերաբերյալ: Նախաքննությունը շարունակվում է։
