Բաքուն պատրաստ է կազմակերպել ՄԱԿ-ի ներկայացուցիչների այցը Լեռնային Ղարաբաղ. Բայրամով
Բաքուն պատրաստ է կազմակերպել ՄԱԿ-ի մարմինների այցը Ղարաբաղ՝ Ադրբեջանում ՄԱԿ-ի համակարգող նախագահի ղեկավարությամբ: Այս մասին հայտարարել է Ադրբեջանի արտաքին գործերի նախարար Ջեյհուն Բայրամովը՝ ԱՄՆ պետքարտուղարի օգնական Յուրի Քիմի հետ Բաքվում կայացած հանդիպմանը:
Քննարկվել է Ադրբեջանի ռազմական հարձակումից հետո Լեռնային Ղարաբաղում ստեղծված իրավիճակը: Բայրամովը տեղեկացրել է, որ Բաքուն պատրաստ է կազմակերպել ՄԱԿ-ի ներկայացուցիչների այցը Լեռնային Ղարաբաղ:
Նա նաև ասել է, որ Ղարաբաղի «հայ բնակիչներին ոչինչ չի սպառնում»:
Անդրադառնալով Հայաստանի հետ հարաբերությունների կարգավորմանը՝ Բայրամովը նշել է. «Չնայած միջազգային գործընկերների միջնորդությամբ Ադրբեջանի բոլոր ջանքերին, հայկական կողմը շարունակում է խոչընդոտել խաղաղ գործընթացին: Ադրբեջանը շահագրգռված է Հայաստանի հետ խաղաղության հաստատմամբ՝ հիմնված տարածքային ամբողջականության և ինքնիշխանության փոխադարձ հարգանքի վրա»։
