«Մեր քաղաքացիներին խնդրում եմ ուշադիր լինել արցախցիների նկատմամբ, շրջապատել նրանց սիրով ու հոգատարությամբ». Հակոբ Արշակյան
Արցախի մեր հարազատներն այսօր մեր հոգատարության ու աջակցության կարիքն ունեն: Ֆեյսբուքյան էջում գրել է ԱԺ փոխնախագահ Հակոբ Արշակյանը․
«Հատկապես այս օրերին շատ են թիրախավորվում Արցախի մեր հայրենակիցները։ Այդ իսկ պատճառով շատ եմ կարևորում, որ արցախցու հույզերի, զրկանքների հաշվին քաղաքական դիվիդենտներ հավաքող, ժամանակին Արցախի, այնուհետև Հայաստանի հաշվին հարստացած, բանակի ու անվտանգության զարգացման հաշվին իրենց նեղ շրջապատների բարեկեցությունն ապահոված մի խմբակի և իր արբանյակների ապապետական գործողությունների պատճառով լարվածություն չառաջանա մեր հայրենակիցների նկատմամբ։
Այսօր հարյուրավոր երեխաներ, քույրեր, եղբայրներ, տատիկներ ու պապիկներ նախընտրում են լքել իրենց տներն ու գալ Հայաստան։ Պետությունն աջակցում է կացարանով, սննդով, դեղորայքով, առաջին անհրաժեշտության պարագաներով՝ բոլոր նրանց, ովքեր դրա կարիքն ունեն։ Նրանք վերոհիշյալ նույն խմբակի գործունեության տուժածներն են։
Արցախի մեր հարազատներն այսօր մեր հոգատարության ու աջակցության կարիքն ունեն։ Մեր քաղաքացիներին խնդրում եմ ուշադիր լինել նրանցից յուրաքանչյուրի նկատմամբ, շրջապատել նրանց սիրով ու հոգատարությամբ»։
