«Շատ եմ ցավում, որ նման սուտ լուրեր են տարածվում». Բորել

«Հավատալ, թե Եվրոպական միությունն, իբր, ցանկանում է Վրաստանն օգտագործել Ռուսաստանի դեմ երկրորդ ճակատ բացելու համար՝ խելագարություն է, մի լսեք նման բաներ», - Թբիլիսիում վարչապետ Իրակլի Ղարիբաշվիլիի հետ համատեղ ասուլիսում հայտարարել է Եվրամիության արտաքին հարաբերությունների և անվտանգության հարցերով բարձր ներկայացուցիչ Ժոզեպ Բորելը:

«Խելագարություն է մտածել, թե որևէ մեկը Եվրամիությունում ցանկանում է պատերազմ տեսնել Վրաստանում։ Շատ եմ ցավում, որ նման սուտ լուրեր են տարածվում։ Որովհետև դրանք խնդիր են ստեղծում։ Դա քարոզչություն է և ապատեղեկատվություն», - ընդգծել է Բորելը:

Նրա խոսքով՝ այդօրինակ քարոզչության նպատակն է թունավորել ժողովրդին, խեղաթյուրել ամեն բան և անվստահություն ստեղծել երկրում։ «Ռուսական քարոզչությունը շատ ակտիվ է», - ընդգծել է ԵՄ բարձր ներկայացուցիչը։