2,6 մլրդ դրամ՝ ՀՀ-ում ճանապարհների նորոգման աշխատանքների համար

Հայաստանում 60.7 կմ ավտոճանապարհների միջին նորոգման աշխատանքների համար 2 մլրդ 624 մլն 260 հազար 800 դրամ ֆինանսավորում կհատկացվի։ Այս որոշումն այսօր միաձայն ընդունվեց կառավարության այսօրվա նիստի ժամանակ։

«Այդ ճանապարհներից 13 կմ–ը միջպետական են, 47 կմ–ը` հանրապետական։ Այս նախագծով 5 ընդհանուր ճանապարհահատված է նորոգվելու։ Որպես կանոն, մենք հետևյալն ենք անում` եթե միջինացված 500 կմ–ը հաշվենք, ապա մոտ 150 կմ ամեն տարի միջին նորոգման եղանակով ենք ասֆալտապատում։ Այս տարի էլ նախնական 150 կմ–ի հաշվարկ ունենք»,– նիստի ժամանակ հայտնեց ՀՀ տարածքային կառավարման և ենթակառուցվածքների նախարար Գնել Սանոսյանը։

Նրա խոսքով` այս աշխատանքները հեշտ և արագ են կազմակերպվում, այդ պատճառով տարվա երկրորդ կեսին է սկսվում դրանց իրականացումը։

Սանոսյանը շեշտեց, որ սա առաջին 60 կմ–ի ֆինանսավորումն է և մոտ 90 կմ–ի համար դեռ նախագծեր և ֆինանսավորում կունենան։

Նախարարն ընդգծեց` մրցույթները հատկացված են, շինարարական ընկերությունները կան, միայն գումարը պետք է հատկացնել, որպեսզի աշխատանքները սկսվեն։