Արևմուտքը ցանկանում է գժտեցնել ԱՊՀ երկրներին, ոչնչացնել կազմակերպությունը. Լեբեդև

Հավաքական Արևմուտքը մտադիր է գժտեցնել ԱՊՀ երկրներին և ոչնչացնել կազմակերպությունը։ Այս հայտարարությունն է արել ԱՊՀ գլխավոր քարտուղար Սերգեյ Լեբեդևը անդամ պետությունների պետական և հանրային հեռուստառադիոընկերությունների ղեկավարների խորհրդի և ԱՊՀ միջպետական տեղեկատվական ֆոնդի վարչական խորհրդի համատեղ նիստում, որն անցկացվել է Մինսկում։

«Պատժամիջոցների քաղաքականությունը, այսպես կոչված հավաքական Արևմուտքի կողմից գործադրվող աննախադեպ դաժան ճնշումը ԱՊՀ երկրների, առաջին հերթին` Ռուսաստանի և Բելառուսի վրա, խրախուսում է մեզ միավորել ջանքերը մեր դեմ կազմակերպված ստի տեղեկատվական արշավին հակազդելու համար: Ինքներդ կարող եք տեսնել, թե որքան սուտ և չարություն կա այժմ արևմտյան ԶԼՄ-ների` մեր երկրների մասին հաղորդագրություններում: Կա մեզ պառակտելու, միմյանց հետ գժտեցնելու, մեր Համագործակցությունը ոչնչացնելու անթաքույց ցանկություն»,- ասել է նա:

Նա ընդգծել է, որ այժմ առավել քան երբևէ կարևոր է նպաստել ԱՊՀ երկրների ժողովուրդների միասնության և բարեկամության պահպանմանը։

Գլխավոր քարտուղարի խոսքով` ԱՊՀ պետությունների ղեկավարները գագաթաժողովներին անկեղծորեն և վստահաբար քննարկում են աշխարհում և Համագործակցության տարածաշրջանում ստեղծված իրավիճակը և մտադիր են ամեն ինչ անել ԱՊՀ-ի ամրապնդման, կազմակերպության երկրների բնակչության կյանքի բարելավման, խնդիրների համատեղ լուծման համար:

ԱՊՀ անդամ են հետխորհրդային երկրներ Հայաստանը, Ռուսաստանը, Ադրբեջանը, Բելառուսը, Ղազախստանը, Ղրղզստանը, Մոլդովան և Տաջիկստանը: