«Խաղաղապահները հրաժարվում են ուղեկցել արցախցիների ավտոերթը դեպի Հակարիի կամուրջ». Օսիպյան

Լեռնային Ղարաբաղում Ռուսաստանի ռուսական խաղաղապահ զորախմբի հրամանատարությունը հրաժարվել է ուղեկցել արցախցիների  ավտոերթը դեպի Հակարիի կամուրջ, որտեղ ապօրինի ադրբեջանական անցակետ է տեղադրվել։ Այս մասին հայտնել է Արցախի Հեղափոխական կուսակցության նախագահ Արթուր Օսիպյանը՝ հրապարակելով ՌԴ խաղաղապահ զորխմբի ղեկավարությունից ստացած նամակը։

«2020 թվականի նոյեմբերի 9-ի եռակողմ հայտարարության դրույթների համաձայն՝ ռուսական խաղաղապահ զորախումբը չի նախատեսում ավտոերթի շարասյուններում մեքենաների ուղեկցում, ինչպես նաև տարբեր գործողությունների և հավաքների անվտանգությունն ապահովելը»,- ասված է ՌԴ խաղաղապահ զորխմբի ղեկավարի տեղակալ Սոզոնովի նամակում։

Ըստ Օսիպյանի՝ սա եռակողմ հայտարարության կոպիտ խախտում է. «Պետք է ընդգծել, որ խաղաղ ավտոերթն ուղեկցելուց և խաղաղապահների կողմից անվտանգության ապահովումից հրաժարվելը նշանակում է, որ խաղաղապահները հրաժարվում են կատարել իրենց ստանձնած պարտավորությունները, խախտում են նոյեմբերի 9-ի հայտարարությունը և, ըստ էության, Ադրբեջանի ղեկավարության հետ համատեղ իրականացնում են Լեռնային Ղարաբաղի շրջափակումը:
 

Միջազգային խաղաղապահների ներգրավման հարցն էլ ավելի հրատապ ու անհրաժեշտ է դառնում»։

[3423bbdb8501043483564095ea1b8363.jpg]

[b122c258f17f5f1962499a1f4cb3f1bb.jpg]