ՌԴ-ն Նորվեգիան ներառել է ոչ բարեկամ երկրների ցանկում․ Նորվեգիայի ԱԳ նախարարն արձագանքել է
Նորվեգիան ներառվել է այն օտարերկրյա պետությունների ցանկում, որոնք «ոչ բարեկամական գործողություններ են կատարում արտասահմանում Ռուսաստանի դիվանագիտական և հյուպատոսական ներկայացուցչությունների դեմ»։ Ինչպես հաղորդում է ՌԻԱ Նովոստին, այս մասին հաղորդագրություն է տարածել ՌԴ կառավարության մամուլի ծառայությունը։
Այս ցանկում ներառելով՝ Մոսկվան ոչ բարեկամ երկրների համար սահմանափակում է կամ ընդհուպ լիովին արգելում է դեսպանություններում, հյուպատոսություններում, պետական մարմինների ներկայացուցչություններում աշխատանքի ընդունել Ռուսաստանի տարածքում գտնվող անձանց։
Ըստ ՌԴ կառավարության որոշման, Նորվեգիան Ռուսաստանում կարող է աշխատանքի ընդունել 27 մարդու։
Ավելի ուշ Նորվեգիայի ԱԳ նախարար Աննիկեն Վիտֆելդը TV 2 հեռուստաալիքի հետ զրույցում մեկնաբանել է ՌԴ կառավարության այս որոշումը՝ նշելով, որ հիմքեր չկան պնդելու, որ Օսլոն ոչ բարեկամական պահվածք է դրսևորում Ռուսաստանի նկատմամբ։
Միևնույն ժամանակ քաղաքական գործիչն ընդգծել է, որ Ռուսաստանի այս որոշման մեջ «զարմանալի ոչինչ չկա»։
Նորվեգիայից բացի, ցանկում ներառված են նաև Ավստրալիան, Ալբանիան, Անդորրան, Միացյալ Թագավորությունը, Բրիտանական անդրծովյան տարածքներ, Եվրամիության անդամ երկրները, Իսլանդիան, Կանադան, Լիխտենշտեյնը, Միկրոնեզիան, Մոնակոն, Նոր Զելանդիան, Նորվեգիան, Կորեայի Հանրապետությունը, Սան- Մարինոն, Հյուսիսային Մակեդոնիան, Սինգապուրը, ԱՄՆ-ն, Թայվանը (Չինաստան), Ուկրաինան, Մոնտենեգրոն, Շվեյցարիան ու Ճապոնիան:
