Ադրբեջանի ԱԳՆ-ն արձագանքել է Փաշինյանի հայտարարություններին

Ադրբեջանի ԱԳՆ-ն արձագանքել է ՀՀ վարչապետ Նիկոլ Փաշինյանի՝ կառավարության այսօրվա նիստում արած հայտարարություններին։

Ըստ ԱԳՆ-ի՝ Հայաստանի վարչապետն իր ելույթով փորձում է միջազգային հանրությանը հերթական անգամ մոլորության մեջ գցել Լաչինի սահմանային անցակետի աշխատանքի, տարածքային ամբողջականության և դելիմիտացիայի հետ կապված հարցերում։ Նրանք պնդել են, թե Լաչինի անցակետը փակ չէ։

Ադրբեջանի ԱԳՆ-ի մատուցմամբ՝ «եթե հայկական կողմն իսկապես շահագրգռված է տարածաշրջանում խաղաղությամբ և կայունությամբ, եթե աջակցում է Ադրբեջանի տարածքային ամբողջականությանը և ինքնիշխանությանը՝ ոչ միայն խոսքով, այլև գործով, ապա պետք է զերծ մնա նման սադրիչ քայլերից, աջակցի Աղդամ-Խանքենդի (Ստեփանակերտ․- խմբ.) ճանապարհի և այլ այլընտրանքային ճանապարհների օգտագործմանը հայ բնակիչներին ներգրավելու համար: Հայկական կողմը ևս չպետք է խոչընդոտի հայ բնակիչների վերաինտեգրմանն ուղղված՝ Ադրբեջանի ջանքերին», - ասված է հայտարարության մեջ:

Հիշեցնենք`  հուլիսի 29-ին ադրբեջանցի սահմանապահներն առևանգել են Վագիֆ Խաչատրյանին` Կարմիր խաչի միջազգային կոմիտեի մեքենայից։ Նա Արցախից Հայաստան էր տեղափոխվում՝ բժշկական օգնություն ստանալու համար։