Անընդունելի է Հայաստանի կողմից Լաչինի ճանապարհի հարցը քաղաքականացնելը․ Հաջիև
Ադրբեջանի նախագահի օգնականը «անընդունելի» է որակել «Հայաստանի կողմից Լաչինի ճանապարհի հարցի քաղաքականացումը»։
Հիքմեթ Հաջիևը ԵՄ երկրների, Թուրքիայի, ԱՄՆ, Շվեյցարիայի դեսպանների մասնակցությամբ հանդիպումից հետո իր թվիթերյան էջում գրել է, թե Հայաստանը «քաղաքական մանիպուլյացիաներով ու սպեկուլյացիաներով» է զբաղվում Լաչինի ճանապարհի հարցով, որով «հնարավոր է բժշկական տարհանում և մատակարարում»։
Հիքմեթ Հաջիևը նշել է, որ Բրյուսելի հանդիպմանը «պայմանավորվածություն է ձեռք բերվել Աղդամ-Խանքենդի» (Ակնա-Ստեփանակերտ) ճանապարհն էլ ավելի մեծ առաքումների համար օգտագործելու հետ կապված։
Նախագահի օգնականը հավելել է, որ այս հարցը «կարևորվել է նաև Կարմիր խաչի միջազգային կոմիտեի հայտարարության մեջ»։
Ըստ նրա՝ «անընդունելի է Հայաստանի՝ միայն Լաչինի ճանապարհից օգտվելու, Աղդամի ճանապարհից հրաժարվելու պնդումն ու խնդրի քաղաքականացումը» (չակերտները - Tert.am)։
Հիշեցնենք, որ Բրյուսելում եռակողմ հանդիպման արդյունքներով իր հայտարարության մեջ ԵՄ խորհրդի նախագահ Շառլ Միշելը հայտնել էր, որ ընդգծել է Լաչինի միջանցքը բացելու անհրաժեշտությունը, ինչպես նաև նշել եմ Ադրբեջանի կամքը՝ հումանիտար աջակցություն տրամադրելու Աղդամի ուղությամբ։
«Ես ընդգծել եմ Լաչինի միջանցքը բացելու անհրաժեշտությունը, ինչպես նաև նշել եմ Ադրբեջանի կամքը՝ հումանիտար աջակցություն տրամադրելու Աղդամի ուղությամբ։ Եվ ես տեսնում եմ երկու տարբերակներն էլ։ Եվ ես խրախուսում եմ, որ հումանիտար մատակարարումները երկու կողմից էլ ապահովեն բնակչության կարիքները»,- իր հայտարարության մեջ նշել էր Շառլ Միշելը։
