Աղդամի երթուղին չպետք է դիտարկել որպես Լաչինի միջանցքի բացման այլընտրանք. Բորել
ԵՄ-ն ի գիտություն է ընդունել Բաքվի՝ Աղդամով ապրանքներ մատակարարելու պատրաստակամությունը, բայց դա Լաչինի միջանցքի բացման այլընտրանք չէ։ Այս հայտարարությունն արել է ԵՄ դիվանագիտության ղեկավար Ժոզեպ Բորելը։
«Եվրամիությունը խորապես մտահոգված է նախկին Լեռնային Ղարաբաղի ինքնավար մարզում տեղի բնակչության վրա ազդող ծանր մարդասիրական իրավիճակով։ Լաչինի միջանցքով երթևեկությունը խոչընդոտվել է ավելի քան յոթ ամիս՝ չնայած այն վերաբացելու մասին Արդարադատության միջազգային դատարանի որոշումներին։ Դեղորայքն ու առաջին անհրաժեշտության ապրանքները պակասում են կամ սպառվել են, ինչը սարսափելի հետևանքներ կունենա տեղի բնակչության համար: Ադրբեջանի իշխանությունները պարտավոր են մոտ ապագայում երաշխավորել Լաչինի միջանցքի անվտանգությունն ու ազատ տեղաշարժը և կանխել ճգնաժամի հետագա սրումը»,- նշվում է տարածված հայտարարության մեջ:
«Մենք ի գիտություն ենք ընդունել Ադրբեջանի իշխանությունների հայտնած պատրաստակամությունը՝ ապրանքներ առաքելու նաև Աղդամ քաղաքով։ Սա չպետք է դիտարկվի որպես Լաչինի միջանցքի բացման այլընտրանք»,- հավելել է Բորելը։
ԵՄդիվանագիտության ղեկավարը նաև նշում է, որ ԿԽՄԿ-ի գործունեությունը տարածաշրջանում խիստ տուժել է և կոչ է անում վերսկսել դրանք՝ ներառյալ բժշկական տարհանումը և մարդասիրական օգնության առաքումը․ «ԵՄ-ն ընդգծում է, որ մարդասիրական հասանելիությունը չպետք է քաղաքականացվի որևէ դերակատարի կողմից»։
Հավելենք, որ Բորելի հայտարարության մեջ օգտագործվել է ոչ միայն Ստեփանակերտ, այլև ադրբեջանական «Խանքենդի» տարբերակը։ Նշվում է, որ Եվրամիությունը և, մասնավորապես, Եվրոպական խորհրդի նախագահ Շառլ Միշելը ակտիվորեն ներգրավված են եղել Հայաստանի և Ադրբեջանի միջև հարաբերությունների կարգավորման գործընթացին աջակցելու, ինչպես նաև «Բաքվի և Ստեփանակերտի/Խանքենդիի» միջև երկխոսության խթանման գործում։
«Այն նույնպես պահանջում է բոլոր կողմերի իրական հանձնառությունը բանակցությունների արդյունքների և ընդհանուր շահերի և փոխադարձ վստահության վրա հիմնված ապագայի նկատմամբ»,- նշվում է հայտարարության մեջ:
