Ռուս պաշտոնաթող գնդապետ Վլադիմիր Կվաչկովը մեղադրվում է ռուսական բանակը վարկաբեկելու մեջ
ՌԴ ԳՀՎ պաշտոնաթող գնդապետ Վլադիմիր Կվաչկովը մեղադրվում է ռուսական բանակը վարկաբեկելու մեջ։ Այս մասին հայտնում են ռուսական ԶԼՄ-ները։
Մեղադրանքի էությունը չի նշվում։ Հայտնի է միայն, որ դա վարչական, ոչ թե քրեական օրենսգրքի հոդված է, և որ Կվաչկովը հրավիրվել է ոստիկանություն՝ արձանագրություն կազմելու համար։
Գլխավոր հետախուզական վարչության պաշտոնաթող գնդապետ, աֆղանական պատերազմի և Տաջիկստանում քաղաքացիական պատերազմի վետերան Վլադիմիր Կվաչկովը հայտնի է իր ծայրահեղ պահպանողական հայացքներով։
Նա ակտիվորեն աջակցում է ուկրաինական պատերազմին, բայց միևնույն ժամանակ քննադատում է Ռուսաստանի ներկայիս իշխանություններին և պաշտպանության նախարարության ղեկավարությանը։
«Վլադիմիր Կվաչկովը հենց նոր ինձ հեռախոսով հաստատեց, որ իր դեմ գործ է հարուցվել բանակը վարկաբեկելու մասին»,- գրում է «Общество.Будущее» քաղաքական շարժման պետերբուրգյան բջջի անդամ Սավա Ֆեդոսեևը։
Գործի հարուցման մասին տեղեկությունը «Осторожно, новости» թելեգրամյան ալիքին հաստատել է Կվաչկովի կինը՝ Նադեժդան։
