Լաչինի սահմանային անցակետի տեղադրումն Ադրբեջանի ինքնիշխան իրավունքն է․ Բայրամով
Ադրբեջանի արտգործնախարար Ջեյհուն Բայրամովը երեկ ընդունել է Բաքվում Ռուսաստանի նոր դեսպան Միխայիլ Եվդոկիմովին։ Այս մասին հայտնում է Ադրբեջանի ԱԳՆ-ն։
Երկու կողմերը նշել են, որ Բաքվի և Մոսկվայի միջև հարաբերությունների զարգացումը կարևոր է։ Քննարկել են նաև Ադրբեջանի և Հայաստանի միջև խաղաղության գործընթացը։
APA գործակալությունը փոխանցում է՝ Բայրամովը հայտարարել է, թե «Ադրբեջանի տարածքային ամբողջականության և ինքնիշխանության մեկնաբանումը հայկական կողմի դիրքորոշման հիման վրա», ինչը, Բաքվի պնդմամբ, տեղ է գտել Ռուսաստանի արտգործնախարարության հուլիսի 15-ի հայտարարությունում, չի համապատասխանում Մոսկվայի և Բաքվի միջև Դաշնակցային փոխգործողության մասին հռչակագրում ամրագրված սկզբունքներին:
Նա նաև պնդել է, որ «Լաչին» անցակետի տեղադրումը Ադրբեջանի ինքնիշխան իրավունքն է և ուղղված է «հակաօրինական գործունեության կանխարգելմանն ու թափանցիկության ապահովմանը»: Բայրամովը կրկնել է «Ադրբեջանի հայ բնակիչների պահանջմունքների բավարարման համար Աղդամ ճանապարհի օգտագործման» առաջարկը, որ արել էր անցած շաբաթ:
