Հայկական կողմն այժմ աշխատանքներ է տանում Մարգարայի կամուրջի մոտ

ԱԺ փոխնախագահ, Հայաստան-Թուրքիա կարգավորման գործընթացում հատուկ ներկայացուցիչ Ռուբեն Ռուբինյանը  հայտարարել է, թե Հայաստանի ու Թուրքիայի միջև վերջին պայմանավորվածությունը եղել է զբոսաշրջային սեզոնի սկզբում ցամաքային սահմանը 3-րդ երկրների քաղաքացիների ու դիվանագիտական անձնագիր ունեցող անձանց համար բացելուն։

Նրա խոսքով, հայկական կողմն այժմ աշխատանքներ է տանում Մարգարայի կամուրջի մոտ՝ անցակետում համապատասխան ենթակառուցվածքները կարգի բերելու համար.

 «Շատ շուտով կավարտենք, հույս ունենք՝ թուրքական կողմը նույնպես կպահի պայմանավորվածությունն ու այս ամառվա ընթացքում պայմանավորվածությունները կիրագործվեն»։

Անդրադառնալով հայ-թուրքական բանակցություններին, նա նշել է, թե գործընթացը կանգնած վիճակում չէ, ըստ անհրաժեշտության, ինքը խոսում է Թուրքիայի հատուկ ներկայացուցչի հետ։

Ինչ վերաբերում է Հայաստանի ու Թուրքիայի հատուկ ներկայացուցիչների նոր հանդիպմանը, ապա Ռուբինյանը տեղեկացրել է, որ դեռ պայմանավորվածություն չկա։