Մորեխներն ու ծղրիդները գրոհել են Եղիպատրուշ գյուղը
Արագածոտնի մարզի Եղիպատրուշ գյուղը ենթարկվել է մորեխների ու ծղրիդների հարձակմանը: Անթիվ-անհամար մորեխներն ու ծղրիդները տարածվել էին ամբողջ գյուղում և բնակիչներին մարտահրավեր նետել: Միջատներն ամենուր էին` արտերում, պատուհաններին, բակերում: Չնայած անձրևոտ եղանակին, գյուղացիները մեծ պայքար են սկսել նրանց դեմ: Auroranews-ի հետ զրույցում գյուղի ղեկավար Մարզպետ Գրիգորյանը նշեց, որ այս պահին որոշակի նահանջ է նկատվում:
«Նախարարության կողմից թույն ենք ստացել, բնակիչները հենց թույնով են պայքար տարել, հետո էլ նախարարությունը դրոն է բերել»,- ասաց Գրիգորյանը, ապա ավելացրեց, որ մի երկու օր է ուժեղ անձրևների պատճառով գործ չեն կարողանում անել:
Գրիգորյանը նշեց, որ նման դեպքերի մասին լսել են, սակայն իրենց գյուղում առաջին անգամ են տեսնում:
«Անձրևի ժամանակ մորեխները դուրս չեն գալիս. նրանք նախընտրում են արևային եղանակը: Պայքար տարել է Էկոնոմիկայի նախարարությունը:
Նույնիսկ նախարարի տեղակալը նշել է, որ պիտի Պաշտպանության նախարարությունից ուղղաթիռ վերցնեն` լայնամաշտաբ պայքարի աշխատանքներ տանելու համար»,- շեշտեց նա:
Թեև մորեխներն ու ծղրիդները տարածվել են ամբողջ գյուղով, այնուամենայնիվ գյուղապետը նշում է, որ վնասներ գրեթե չկան: Նրանց դեմ պայքարի համար գյուղացիները սպասում են եղանակի բարելավմանը:
