Երևանում քաղաքացուն գետնին տապալած ոստիկանի լիազորությունները դադարեցվել են

Երևանի Սարյան փողոցում «Երևանի գինու օրեր» փառատոնի ընթացքում քաղաքացուն հարվածած ոստիկանի լիազորությունները ժամանակավորապես դադարեցվել են։ ՀՀ ՆԳՆ ոստիկանության մամուլի ծառայությունը պարզաբանում է տարածել դեպքի առնչությամբ։

Նշենք, որ ավելի վաղ սոցցանցերում տարածվել էր տեսանյութ, որում երևում էր, թե ինչպես է ոստիկանը հարվածում քաղաքացուն, որից հետո վերջինս ուշագնաց է լինում։

«Քաղաքացու և ոստիկանի միջև համացանցում տարածված միջադեպի առնչությամբ տեղեկացնում ենք. մայրաքաղաքի Սարյան փողոցում «Երևանի գինու օրեր» փառատոնի ժամանակ քաղաքացու և ոստիկանի միջև միջադեպից քիչ անց տեղեկութուն է ստացվել ՆԳՆ ոստիկանության ներքին անվտանգության վարչությունում։ Նշանակվել է ծառայողական քննություն, ոստիկանի ծառայողական լիազորությունները ժամանակավորապես դադարեցվել են»,–նշված է պարզաբանման մեջ։

Նշենք, որ «Երևանի գինու օրեր» փառատոնը անցկացվում է հունիսի 2-4-ը, ժամը 16։00–22։30։ Փակ են Թումանյան, Մոսկովյան և Սարյան փողոցները։