Մեսսին ռեկորդային առաջարկ է ստացել Սաուդյան Արաբիայից
«Պարի Սեն Ժերմենի» և Արգենտինայի հավաքականի հարձակվող Լիոնել Մեսսին ռեկորդային առաջարկ է ստացել Սաուդյան Արաբիայից։ Այս մասին հայտնում է L'Équipe-ը։
Աղբյուրի համաձայն՝ արգենտինացուն 600 միլիոն եվրոյի պայմանագիր է առաջարկվում երկու մրցաշրջանի համար:
Մեսսիի համար առաջնային տարբերակը Եվրոպայում խաղալն է։ Հարձակվողը կարող է վերադառնալ «Բարսելոնա», սակայն այս տեղափոխությունը քիչ հավանական է կատալոնական ակումբի ֆինանսական խնդիրների պատճառով։
Ավելի վաղ հաղորդվում էր, որ Մեսսիի կինը դեմ է եղել ֆուտբոլիստի` Սաուդյան Արաբիա տեղափոխվելուն։
Հիշեցնենք, որ ֆրանսիական ակումբը Մեսսիին երկու շաբաթով հեռացրել էր թիմի հետ մարզումներից՝ առանց թույլտվության Սաուդյան Արաբիա մեկնելու պատճառով: Արգենտինացին հանդես է եկել հայտարարությամբ եւ ներողություն խնդրել ակումբի խաղացողներից ու անձնակազմից։ Ենթադրվում էր, որ Մեսսին կհեռանա թիմից, սակայն ֆուտբոլիստի ներողությունից հետո նրա պայմանագրի հետ կապված իրավիճակը կարող է փոխվել։
Ֆուտբոլիստը ՊՍԺ է տեղափոխվել «Բարսելոնայից» 2021 թվականի օգոստոսին։ Նրա պայմանագիրն ակումբի հետ նախատեսված է մինչև 2023 թվականի հունիսը:
