Ատոմակայանի 2–րդ էներգաբլոկը կանգնել է նախազգուշական վերանորոգման
Հայաստանի ատոմակայանի էլեկտրակայանի 2–րդ էներգաբլոկն այսօրվանից կանգնել է վերանորոգման։ Տեղեկությունը հրապարակվել է ՀԱԷԿ–ի ֆեյսբուքյան էջում։
«Մայիսի 5-ին՝ ժամը 01:45, ՀԱԷԿ-ի թիվ 2 էներգաբլոկը կանգնեց ամենամյա պլանային նախազգուշական վերանորոգման` 75 օր տևողությամբ»,– ասված է հաղորդագրության մեջ:
Նախատեսվում է իրականացնել հետևյալ հիմնական աշխատանքները.
ռեակտորի միջին վերանորոգում՝ ակտիվ գոտու լրիվ բեռնաթափմամբ,
թիվ 2 և 3 գլխավոր շրջանառու պոմպերի հիմնանորոգում,
թիվ 2 և 3 շոգեգեներատորների հիմնանորոգում,
տուրբագեներատորների ընթացիկ վերանորոգում,
շոգետուրբինների ընթացիկ վերանորոգում:
Ատոմակայանից հայտնում են, որ վերը նշված հիմնական աշխատանքներից բացի, իրականացվելու են անվտանգային որոշ համակարգերի արդիականացմանն ուղղված աշխատանքներ, ինչպես օրինակ՝ պատասխանատու սպառիչների հովացման համակարգի խողովակաշարերի փոխարինում:
Նախատեսվող աշխատանքներում ՀԱԷԿ-ի հիմնական արտադրամասերի աշխատակիցներից բացի ներգրավված են ատոմակայանների համակարգերի և սարքավորումների վերանորոգման հարուստ փորձ ունեցող մասնագետներ Ռուսաստանի Դաշնությունից, Խորվաթիայից, Չեխիայից և այլ երկրներից:
Վերանորոգման գործընթացն իրականացվելու է ՀՀ Միջուկային անվտանգության կարգավորման կոմիտեի մասնագետների վերահսկողության ներքո:
ՀԱԷԿ-ի թիվ 2 էներգաբլոկի գործարկումը նախատեսվում է հուլիսի 18-ին:
