Խոշոր վթար՝ Երևանում․ կան տուժածներ, վրաերթի ենթարկված քաղաքացի
Այսօր՝ մայիսի 3-ին, խոշոր ու շղթայական ավտովթար է տեղի ունեցել Երևանում։ Ժամը 09։30-ի սահմաններում Շինարարների փողոցում բախվել են BMW, 3 Mercedes, Ford Transit և Opel մակնիշի ավտոմեքենաները։
Ինչպես դեպքի վայրից հայտնում է ֆոտոլրագրող Գագիկ Շամշյանը, վթարի հետևանքով տեղի է ունեցել նաև վրաերթ, ապա 2 հոգի մարմնական վնասվածքներով տեղափոխվել են «Արմենիա» բժշկական կենտրոն։
Օպերատիվ են գործել Երևանի 1-03 շտապօգնության բժիշկների հերթապահ խումբը, ովքեր վիրավորներին մինչև հիվանդանոց տեղափոխելը, տեղում առաջին բուժօգնությունն են ցուցաբերել։
Հրշեջ-փրկարարները հոսանքազրկել են ավտոմեքենաները, փակել մի քանի ավտոմեքենաների գազաբալոններն ու տեղում իրականացրել հերթապահություն։
Ըստ դեպքի վայրում հավաքված քաղաքացիների՝ Mercedes մակնիշի 37 TA 839 համարանիշի ավտոմեքենան բախվել է մեկ այլ Mercedes-ի և Opel-ի, ապա առաջ ընթացել և բախվել կայանված մեկ այլ Mercedes-ի, վերջինն էլ առաջ ընթանալով, բախվել է կայանված Ford Transit-ի, վերջինն էլ բախվել է կայանված BMW-ին։
