Թաթոյանը Տեղ, Արավուս, Կոռնիձոր գյուղերից լուսանկարներ է հրապարակել և գրառում կատարել

ՀՀ ՄԻՊ նախկին պաշտպան Արման Թաթոյանը լուսանկարներ է հրապարակել Սյունիքի մարզի Տեղ, Արավուս, Կոռնիձոր գյուղերից և գրառում կատարել: 

«Սյունիքի Տեղ, Կոռնիձոր, Արավուս գյուղերում վաղ առավոտից իրականացրել ենք փաստահավաք աշխատանքներ: 

Ապացույցներով ամրագրել ենք ադրբեջանական հանցավոր ներխուժումները ՀՀ ինքինշխան տարածք` Սյունիքի մարզի Տեղ համայնքի հատվածում:

Փաստերը հաստատում են, որ ադրբեջանական զինված ծառայողների անօրինական ներկայությունն ուղղակի անհնարին է դարձրել մարդկանց բնականոն, անվտանգ կյանքը, մարդիկ չեն կարողանում օգտագործել օրինական հիմքերով իրենց պատկանող արոտավայրերն ու վարելահողերը։ Խաղաղ բնակիչների անգամ տները, տնամերձ հողամասերը, դպրոցը կամ մանկապարտեզը գտնվում են ադրբեջանական թիրախի ներքո: 

Այս ամենին էլ գումարվում է ադրբեջանական իշխանության հայատյաց ու թշնամանքի քաղաքականությունը, մեր ժողովրդի նկատմամբ ադրբեջանական զինված ծառայողների հանցանքների հովանավորությունն ու անպատժելիությունը: 

Թե´ ՀՀ Զինված ուժերի, թե´ Սահմանապահ զորքերի ծառայողները խաղաղ բնակչությանն անմիջականորեն պաշտպանում են ադրբեջանական հանցավոր արարքներից։ Հետևաբար, մեր զինված ծառայողների կյանքը և առողջությունը նույնպես միջազգային ուղիղ պաշտպանության ներքո են։ Այցի արդյունքներն առավել մանրամասն հատուկ սկզբունքով կվերլուծվեն, կամփոփվեն և զեկույցով կհրապարակվեն»,- ասել է նա և հավելել, որ դրանք կուղարկվեն նաև միջազգային կառույցներին:

[5dc9e7b7e158208e9109230f6788663b.jpg]
[8537dd0968a67805718f09ae38bf1a62.jpg]
[244e39151d503b9c77c6220403ad20fe.jpg]
[63cf262e1fe8d44c0b9868cabed8c0c6.jpg]
[53b849a492864b2eaf53be17611a25df.jpg]
[113109cb34143077b23d51ff90b5f662.jpg]

Հիշեցնենք, որ Արման Թաթոյանն այսօր այցելել է Սյունիքի մարզի Տեղ, Արավուս, Կոռնիձոր գյուղեր` իրականացնելու փաստերի հավաքագրում, վերլուծություն և ամփոփում` անհրաժեշտ գործընթացների համար ամրագրում հավաստի ապացույցներ` միջազգային կառույցներին ներկայացնելու նպատակով: