Ներկայացրեք Ուկրաինայի հարցով ձեր ծրագիրը․ Սի Ծինփինը՝ Մակրոնին

Չինաստանի նախագահ Սի Ծինփինը Ֆրանսիայի նախագահ Էմանուել Մակրոնին առաջարկել է ներկայացնել Ուկրաինայի հակամարտության կարգավորման իր ծրագիրը։ Այս մասին գրում է RTHK կայքը։
 

Երկու երկրների ղեկավարները Գուանչժոուում ոչ պաշտոնական հանդիպման ժամանակ մտքեր են փոխանակել ուկրաինական ճգնաժամի շուրջ։

Չինաստանի ղեկավարը նշել է, որ ֆրանսիական կողմը կարող է կոնկրետ առաջարկներ անել ճգնաժամի քաղաքական կարգավորման համար, իսկ Չինաստանը պատրաստ է աջակցել երկրին այդ հարցում և կառուցողական դեր խաղալ։
 

«Ֆրանսիական կողմը նաև կարծում է, որ ուկրաինական ճգնաժամի քաղաքական լուծումը պետք է հաշվի առնի բոլոր կողմերի օրինական շահերը։ Ֆրանսիան մեծ նշանակություն է տալիս Չինաստանի միջազգային ազդեցությանը և պատրաստ է շփվել և սերտորեն համագործակցել չինական կողմի հետ՝ համատեղ ջանքեր գործադրելու,նպաստելու ճգնաժամի շուտափույթ քաղաքական լուծմանը», - Մակրոնի խոսքերն է մեջբերում կայքը։
 

Սի Ծինփինը և Էմանուել Մակրոնը եզրակացրել են, որ «ուկրաինական ճգնաժամի պատճառները բարդ են, և ցանկացած հետաձգում կվնասի բոլոր կողմերին, և շուտափույթ զինադադարը բխում է բոլոր շահագրգիռ կողմերի և աշխարհի շահերից»: