Չավուշօղլուն՝ հայ-թուրքական սահմանի բացման մասին
Թուրքիայում Հայաստանի դեսպանության բացումը մոտ ապագայի օրակարգում չկա, սակայն երկրներն աշխատում են սահմանային անցակետերի բացման ուղղությամբ։ Այս մասին երկուշաբթի A Haber հեռուստաալիքի եթերում հայտարարել է Թուրքիայի արտգործնախարար Մևլութ Չավուշօղլուն։
«Մոտ ապագայում (Հայաստանի դեսպանատան բացումը) կարող է տեղի չունենալ, քանի որ նախ պետք է այլ քայլեր ձեռնարկել, մենք բացել ենք մեր օդային տարածքը Հայաստանի համար, բեռնափոխադրումներ են իրականացվում, փոխադարձ օդային հաղորդակցություն է սկսվել, հայկական օդային ավիափոխադրողները կարող են մեր տարածքով թռչել երրորդ երկրներ։ Բայց ցամաքային անցակետեր բացելու համար, քաղաքական պայմաններին զուգահեռ, նախ պետք է ճանապարհներ պատրաստել, վերականգնել կամուրջը։ Եվ մենք արդեն ունենք կամուրջի կառուցման պայմանավորվածություններ»,- ասել է նա։
Չավուշօղլուն մանրամասնել է, որ ցամաքային սահմանի բացումը ենթադրվում է իրականացնել «դիվանագիտական անձնագրեր ունեցողների կամ երրորդ երկրների շարքային քաղաքացիների համար»։
Չավուշօղլուն նշել է, որ Հայաստանի հետ սահմանային հատվածում կա «պատմական Մետաքսի ճանապարհի 900-ամյա կամուրջ, որը պետք է վերականգնվի և ամրացվի տարանցման ապահովման համար։ Միևնույն ժամանակ, Թուրքիայի արտգործնախարարն ընդգծել է, որ յուրաքանչյուր քայլ Հայաստանի հետ հարաբերությունների կարգավորման ուղղությամբ ձեռնարկվում է «Ադրբեջանի հետ խորհրդակցություններից հետո»»։
Չավուշօղլուն ասել է, որ որպես Ադրբեջանի և Հայաստանի միջև մշտական խաղաղ կարգավորման հասնելու հեռանկարի մաս՝ Թուրքիան աջակցում է կողմերին, ինչպես նաև խրախուսում և օգնում է տարածաշրջանում ենթակառուցվածքային և լոգիստիկ նախագծերի իրականացմանը։
Ապրիլի 6-ին Հայաստանի պետական եկամուտների կոմիտեն հայտարարեց, որ սկսել է նախապատրաստական աշխատանքները Թուրքիայի հետ սահմանին գտնվող Մարգարա անցակետի հնարավոր բացման համար, որը նախատեսված է լինելու երրորդ երկրների քաղաքացիների համար։
