ՏԵՍԱՆՅՈՒԹ․ Նախորդ օրը տեղի է ունեցել հերթական աղաղակող միջադեպը. Նիկոլ Փաշինյան
Նախորդ օրվա միջադեպը կրկին արձանագրեց, որ Արդարադատության միջազգային դատարանի վճիռը չի կատարվում։ Կառավարության նիստի մեկնարկից առաջ ասաց ՀՀ վարչապետ Նիկոլ Փաշինյանը` անդրադառնալով միջադեպին, երբ ադրբեջանցիները չէին թույլատրել Գորիսից Ստեփանակերտ մեկնողներին գնալ սեփական տներ։
«Նախորդ օրը տեղի է ունեցել հերթական աղաղակող միջադեպը, երբ ԼՂ մի խումբ բնակիչների, որոնք Գորիսից Ստեփանակերտ են գնալիս եղել, թույլ չի տրվել վերադառնալ իրենց տներ։ Այս փաստագրված պատմությունը ևս մեկ անգամ ի ցույց է դնում նախկինում մեր հնչեցրած գնահատականները, որոնք առավել ևս սրվում են Արդարադատության միջազգային դատարանի կայացրած որոշման ֆոնին»,–ասաց Փաշինյանը։
Նրա խոսքով` պետք է շարունակեն միջազգային դիվանագիտական ջանքերը դատարանի որոշման կատարման ուղղությամբ։
Փաշինյանը հավելեց, որ հումանիտար իրավիճակը ԼՂ–ում շարունակում է մնալ լարված` Լաչինի միջանցքը փակված լինելու հետևանքով։ ԼՂ–ում գազամատակարարումն ու էլեկտրաէներգիայի մատակարարումը շարունակում են դադարեցված մնալ։
Հիշեցնենք՝ երեկ Արցախի նախագահ Արայիկ Հարությունյանի խորհրդական Դավիթ Բաբայանը Auroranews-ի հայտնեց, որ ադրբեջանցիները կանգնեցրել էին հայ կանանց և երեխաներին տեղափոխող ավտոբուսը, հայհոյել ու սպառնացել։
