Ամեն զույգ 3 երեխա պետք է ունենա․ Արմեն Մուրադյան

Հայաստանում 60-ից ավելի բարձր տարիքային խմբի բնակչությունն ավելի շատ է, քան 5 տարեկանները, ինչը  մտահոգիչ է, քանի որ 60-ից ավելի բարձր տարիքային խմբին, գլոբալ առումով, պահողներ են պետք՝ ապահովելով նրանց սոցիալական և տնտեսական անվտանգության երաշխիքները: 

յս մասին «Հայաստանում ժողովրդագրական իրավիճակի բարելավման առողջապահական ասպեկտները» թեմայով համաժողովին նշել է Երևանի պետական բժշկական համալսարանի ռեկտոր Արմեն Մուրադյանը: 

«Ժողովրդագրական ցուցանիշները հանդիսանում են կարևորագույն անվտանգության երաշխիքը յուրաքանչյուր երկրի ժողովրդի և պետականության համար: Մասնագետները քննարկելու են հիմնական ցուցանիշները, որոնք ազդում են ժողովրդագրական տվյալների վրա, մասնավորապես, ծնելությունն ու մահացությունը, միգրացիոն պրոցեսները, և փորձելու են մասնագիտական կարծիքները ձևավորել վերարտադրողական նոր սարքավորումների ու դրանց մատչելիության վերաբերյալ»,- ասել է Մուրադյանը:

Ռեկտորը ընդգծել է, որ կարևոր է, որ յուրաքանչյուր ընտանիքում 3 և ավել երեխա ծնվի: Նրա համոզմամբ՝ սա Հայաստանի համար խիստ կարևոր է:

«Վերջին տարիներին նկատվում է, որ ընտանիքում երրորդ երեխայի ծնելիության դեպքերն ավելացել են: Ցուցանիշներն այդ մասին են խոսում, բայց, այնուամենայնիվ, պարզ վերարտադրողականության համար ամեն զույգ 3 երեխա պետք է ունենա»,- ասել է  նա:

Երևանի պետական բժշկական համալսարանի կլինիկական աշխատանքների կազմակերպման վարչության պետ Դավիթ Մելիք-Նուբարյանը նշեց, որ ԵՊԲՀ-ն, գիտակցելով խնդրի կարևորությունը, գնահատելով այն մեծ աշխատանքները, որոնք իրականացվում են պետական կառավարման մարմինների կողմից ժողովրդագրական իրավիճակի բարելավման ուղղությամբ, համաժողովի կազմակերպման անհրաժեշտություն է տեսել: