ՏԵՍԱՆՅՈՒԹ. Օգտվելով Սիմոնյանի ներկայությունից` ոստիկանները սկսեցին Սահակյանին բրդբրդել. Օհանյան

«Պետաիրավական հարցերի հանձնաժողովում՝ փակ քննարկման ժամանակ, կոնֆլիկտ է տեղի ունեցել մեր ու ՔՊ-ական պատգամավորի միջև: Կոնֆլիկտից հետո իրավիճակը հարթեցվել էր: Ոստիկանությունը եկավ իմ սենյակ՝ ասելով, որ Մհեր Սահակյանին ուզում են հարցաքննեն: Այնինչ, եթե այդպիսի որոշում է ընդունվել, պետք է երկուստեք լինի»,- անդրադառնալով ԱԺ-ում տեղի ունեցած միջադեպին՝ լրագրողների հետ զրույցում ասել է «Հայաստան» խմբակցության ղեկավար Սեյրան Օհանյանը: 

Նրա խոսքով՝ իր տեղեկություններով, միջադեպի հրահրումը տեղի է ունեցել հանձնաժողովի նախագահ Վլադիմիր Վարդանյանի կողմից:

«Մենք արդեն պայմանավորվել էինք ոստիկանության հետ, հրավիրեցինք Մհեր Սահակյանին, որպեսզի գնա ոստիկանության Արաբկիրի բաժին: Այդ պահին ներս մտավ Ալեն Սիմոնյանը ու, կարելի է ասել, իր գործողություններով, ըստ էության, ներքին խառնաշփոթն ինքը կազմակերպեց,- շարունակելով ԱԺ-ում տեղի ունեցած միջադեպի թեման՝ լրագրողների հետ զրույցում ասաց «Հայաստան խմբակցության ղեկավար Սեյրան Օհանյանը: «Օգտվելով Սիմոնյանի ներկայությունից՝ ոստիկանության ներկայացուցիչները սկսեցին Սահակյանին բրդբրդել ու մեծ խառնաշփոթ կազմակերպեցին իմ աշխատասենյակում ու միջանցքում»,- հավելեց պատգամավորը: