Թուրքիայից ասել են` քանի օտարերկրացի է զոհվել երկրաշարժի հետևանքով

Թուրքիայում երկրաշարժերի հետևանքով զոհվել է ավելի քան 6,6 հազար օտարերկրացի, հիմնականում՝ սիրիացի, զոհերի ընդհանուր թիվը կազմել է 48,4 հազար։ Այս մասին երկուշաբթի օրը հայտարարել է Թուրքիայի ՆԳՆ ղեկավար Սուլեյման Սոյլուն։ Տեղեկատվությունը փոխանցում է ՏԱՍՍ-ը:

«Այս պահի դրությամբ հայտնի է 48448 մահվան դեպք, երկրաշարժերի հետևանքով զոհված օտարերկրյա քաղաքացիների թիվը կազմում է 6660 մարդ, հիմնականում դրանք մեր սիրիացի եղբայրներն ու քույրերն են»,- ասուլիսում ասել է նա։

Սոյլուի խոսքով՝ հանրապետության իշխանությունները նախատեսում են մարզերում տեղադրել կոնտեյներային քաղաքներ, որոնք կկարողանան տեղավորել ավելի քան 115,5 հազար ընտանիք։

Թուրքիայի հարավ-արևելքում գտնվող Քահրամանմարաշ նահանգում փետրվարի 6-ին 7,7 և 7,6 մագնիտուդ ուժգնությամբ երկու ավերիչ երկրաշարժ է տեղի ունեցել։ Ստորգետնյա ցնցումները, որին հաջորդել են հազարավոր հետցնցումներ, զգացվել են հանրապետության 11 նահանգներում և հարակից երկրներում, որոնցից ամենաշատը տուժել է Սիրիան։