Ռուսաստանում դադարեցվել է MacBook-ի և iPad-ի երաշխիքային սպասարկումը

Apple-ը դադարեցրել է MacBook-ի և iPad-ի երաշխիքային սպասարկումը Ռուսաստանում։  Ինչպես Интерфакс-ին հայտնել են մի շարք սպասարկման կենտրոններից և Apple-ի աջակցման կենտրոններից, համապատասխան որոշման պատճառ են դարձել Ռուսաստան ներմուծման սահմանափակումները, այդ թվում՝ պահեստամասերի։

Apple-ի աջակցության և լիազորված սպասարկման կենտրոններն ընդգծել են, որ խոսքը ամբողջական դադարեցման մասին չէ, այլ ժամանակավոր կասեցման, այնուամենայնիվ իրենք չեն կարող ասել, թե երբ այն կարող է վերսկսվել:
 

iPhone հեռախոսների երաշխիքային սպասարկումն իրականացվում է սովորական ռեժիմով։
 

Միևնույն ժամանակ, Apple-ի սարքավորումներ վաճառող re:Store ընկերությունը հայտնել է, որ իրենք շարունակում են երաշխիքային ծառայություն մատուցել իրենցից գնված MacBook-երի և iPad-ների համար՝ «ինչպես պահանջում է օրենքը»։ Интерфакс-ի հետ զրույցում սպասարկման կենտրոններից մեկում նաև խորհուրդ են տվել «ինչ-որ բան պատահելու դեպքում» դիմել վաճառողին երաշխիքային սպասարկման համար:

Apple-ը, ինչպես և շատ այլ արտասահմանյան ընկերություններ, Ռուսաստանի Դաշնություն Ուկրաինա լայնամասշտաբ ներխուժումից հետո դադարեցրել է աշխատանքը ռուսական շուկայում: Մասնավորապես, Apple Pay վճարային համակարգը դադարել է աշխատել Ռուսաստանում, վաճառքները դադարեցվել են նաև կորպորացիայի պաշտոնական առցանց խանութում։