Մոլդովայում ռումիներենը հաստատել են որպես պետական լեզու

Մոլդովայի խորհրդարանն առաջին ընթերցմամբ ընդունել է օրինագիծ, որը նախատեսում է փոփոխություններ բոլոր օրենսդրական ակտերում, այդ թվում՝ Հանրապետության Սահմանադրության մեջ։ Ինչպես գրում է Интерфакс-ը՝ առաջարկվող փոփոխություններով՝ «Մոլդովական լեզու» արտահայտությունը կփոխարինվի «ռումիներենով»:
 

Հեղինակները վկայակոչում են Սահմանադրական դատարանի երեք որոշում, այդ թվում՝ 2013 թվականի դեկտեմբերի 5-ի։ Ըստ այս փաստաթղթի՝ Մոլդովայի պետական ​​լեզուն ռումիներենն է։

Օրինագիծը լուրջ քննադատության է ենթարկվել ընդդիմադիր Կոմունիստների և սոցիալիստների դաշինքի կողմից, որի պատգամավորները պաստառներով փակել են խորհրդարանի ամբիոնը։
 

Սահմանադրության համաձայն՝ Հիմնական օրենքի փոփոխությունները կարող են հաստատվել «պատգամավորների ձայների երկու երրորդով» և «համապատասխան օրինագծի գրանցումից ոչ շուտ, քան վեց ամիս հետո և միայն Սահմանադրական դատարանի դրական եզրակացությամբ»։ Նաեւ ըստ Սահմանադրության՝ «Սահմանադրությունը չի կարող վերանայվել արտակարգ դրության, պաշարման կամ ռազմական դրության ժամանակ»։

Ներկայումս, Մոլդովայի Սահմանադրության 13-րդ հոդվածի համաձայն, Մոլդովայի Հանրապետության պետական ​​լեզուն «մոլդովական լեզուն է, որը գործում է լատինատառի հիման վրա»։

Նշենք, որ որոշ ժամանակակից լեզվաբաններ մոլդովերենն ու ռումիներենը համարում են նույն լեզվի տարբեր անվանումներ։