Թուրքիայի ավերիչ երկրաշարժի հետևանքները՝ թվերով
Թուրքիայում ավերիչ երկրաշարժերի նյութական վնասը կազմում է 34,2 մլրդ դոլար (645 մլրդ 884 մլն 100 հազար թուրքական լիրա), գրում է Ermenihaber.am-ը։
Համաշխարհային բանկի (ՀԲ) Թուրքիայի տնօրեն Հումբերտո Լոպեսը «Աղետների վնասի գլոբալ գնահատման համաշխարհային զեկույցը» ներկայացնելիս ասել է, որ այս ցուցանիշը համապատասխանում է Թուրքիայի համախառն ներքին արդյունքի (ՀՆԱ) 4%-ին։
Զեկույցում նշվում է, որ շարունակվող հետցնցումները կարող են ժամանակի ընթացքում մեծացնել վնասի չափը:
Նշելով, որ Թուրքիայի ամենաաղքատ նահանգներից մի քանիսը նույնպես գտնվում են երկրաշարժի գոտում, զեկույցում ասվում է, որ տարածաշրջանում բնակվում է սիրիացի փախստականների գրեթե 50 տոկոսը՝ ավելի քան 1,7 միլիոն մարդ:
Զեկույցում նաև հաշվարկվել է, որ 1,25 միլիոն մարդ ժամանակավորապես անօթևան է մնացել շենքերի ամբողջական կամ մասնակի փլուզման պատճառով:
Թուրքական կողմի պաշտոնական տվյալներով՝ երկրաշարժերի վնասների չափը, որոնց զոհ է դարձել 44374 մարդ, դեռ ճշտվում է։
